ژووری هه‌وال / داركۆ سعید

 تازه‌ کراوه‌ته‌وه‌ له‌ ڕۆژی05/ 6/ 2010

&&&&&&&&&&&&&&&&&&&&&&&&&&&&&&

جه‌بار یاوه‌ر: سوپای‌ ئێران به‌ قوڵایی‌ 2 كم سنوری‌ هه‌رێمی‌ كوردستانی‌ به‌زاندوه‌

وته‌بێژی‌ فه‌رمانده‌یی‌ هێزه‌كانی‌ پاراستنی‌ سنور ئاشكرایکرد، که‌ هێزه‌كانی‌ سوپای‌ ئێران به‌ قوڵایی‌ 2كم‌و به‌ پانتایی‌ 3كم له‌ سنوری‌ حاجی‌ ئۆمه‌رانه‌وه‌ سنوری‌ هه‌رێمی‌ كوردستانیان به‌زاندوه‌.جه‌بار یاوه‌ر، وته‌بێژی‌ فه‌رمانده‌یی‌ هێزه‌كانی‌ پاراستنی‌ سنور به‌ (ئه‌سوات ئه‌لعیراق)ی‌ راگه‌یاند: ماوه‌ی‌ 14 رۆژه‌ تۆپبارانی‌ ناوچه‌ سنورییه‌كانی‌ هه‌رێم له‌لایه‌ن ئێرانه‌وه‌ به‌رده‌وامه‌‌و رۆژی پێنجشه‌ممه‌ش هێزێكی‌ سوپای‌ ئه‌و وڵاته‌ له‌ناوچه‌ی‌ (پرده‌ نازی‌) رۆژهه‌ڵاتی‌ حاجی‌ ئۆمه‌ران، به‌ قوڵایی‌ 2 كم‌و به‌ پانتایی‌ 3 كم هاتونه‌ته‌ خاکی هه‌رێمه‌وه‌ و دو ره‌بیه‌یان‌ له‌ ناوچه‌که‌ داناوه‌.وتیشی‌: هێزه‌كه‌ چه‌كی‌ سوكیان‌ پێیه‌‌و له‌گه‌ڵ ئۆتۆمبێل و ئامێر و که‌ره‌سته‌ی سه‌ربازیش.جه‌بار یاوه‌ر راشیگه‌یاند: بۆ ئه‌و مه‌به‌سته‌ فه‌رمانده‌یی‌ هێزه‌كانی‌ پاراستنی‌ سنوری‌ هه‌رێم نوێنه‌ری‌ هه‌رێمی‌ له‌ ئێران ئاگاداركردۆته‌وه‌، بۆ ئه‌وه‌ی رێوشوێنی‌ پێویست بگرێته‌ به‌ر بۆ كۆتایی هێنان به‌و پێشێلكاریی و سنور به‌زاندنه‌ی هێزه‌کانی ئێران بۆ ناو خاکی هه‌رێم‌.ماوه‌ی‌ چه‌ند هه‌فته‌یه‌كه‌ تۆبارانكردنی‌ ناوچه‌ سنورییه‌كانی‌ هه‌رێم له‌لایه‌ن هێزه‌كانی‌ ئێرانه‌وه‌ به‌چڕی ده‌ستیپێكردۆته‌وه‌‌، رۆژی‌ یه‌كشه‌ممه‌ی‌ رابردوش (30/5) كچێكی‌ ته‌مه‌ن 14 ساڵ له‌ناوچه‌ی‌ چۆمان له‌و تۆپبارانه‌دا گیانی‌ له‌ده‌ستدا

&&&&&&&&&&&&&&&&&&&&&&&&&&&&&&&&&&

دانیشتوانی‌ 3 گوندی‌ سنوری‌ ناحیه‌ی‌ سه‌نگه‌سه‌ر ئاواره‌بون و تائێستاش حكومه‌تیش به‌هانایانه‌وه‌ نه‌چوه‌

تۆپبارانكردنی‌ ناوچه‌ سنورییه‌كانی‌ ده‌ڤه‌ری‌ پشده‌ر له‌لایه‌ن كۆماری‌ ئیسلامی‌ ئێرانه‌وه‌ به‌رده‌وامه‌ و به‌و هۆیه‌شه‌وه‌ دانیشتوانی‌ گونده‌كانی‌ (ئه‌بوبه‌كره‌ و قه‌ڵاتوكان و ورته‌) ئاواره‌ی‌ ناوچه‌ ئارامه‌كان بون و گونده‌كانیان چۆڵ كردوه‌، هاوڵاتیانیش ئاماژه‌ بۆ ئه‌وه‌ ده‌که‌ن که‌ حکومه‌ت هیچ ئاوڕێکی لێ نه‌داونه‌ته‌وه‌و داوا ده‌که‌ن حکومه‌ت پێداویستییه‌ سه‌ره‌تاییه‌کانیان بۆ دابین بکات.به‌هۆی تۆپبارانی چه‌ند هه‌فته‌ی رابردوی ناوچه‌ سنورییه‌کانه‌وه‌ له‌لایه‌ن کۆماری ئیسلامی ئێرانه‌وه‌، وێڕای ئاواره‌بونی هاوڵاتیانی گونده‌کان و چۆڵکردنی ناوچه‌کانیان، خانوی‌ ژماره‌یه‌ك له‌ هاوڵاتیانی‌ گوندی‌ ئه‌ستێرۆكان و دو پڕۆژه‌ی‌ ئاو له‌ سنوری‌ سه‌نگه‌سه‌ر وێران بون، ئاواره‌كانی‌ گونده‌كانی‌ سنوری‌ شارۆچكه‌ی‌ سه‌نگه‌سه‌ریش له‌ بناری‌ قه‌ندیل ئاماژه‌ به‌وه‌ ده‌كه‌ن له‌ ژیانێكی‌ سه‌ختدان.موسا مه‌لا عه‌لی،‌ یه‌كێكه‌ له‌ ئاواره‌كان و به‌ (سبه‌ی)‌ راگه‌یاند: له‌ ژیانێكی‌ سه‌ختدا ده‌ژین و دوای‌ پرۆسه‌ی‌ ئازادی‌ عێراقیش ئێمه‌ هه‌ر ئازاد نه‌بوین و به‌رده‌وام گونده‌كانمان تۆپباران كراون و له‌ مه‌ترسیدا ژیاوین.وتیشی: چه‌ند رۆژێكه‌ ئاواره‌بون و هیچ پێداویستییه‌كمان بۆ دابین نه‌كراوه‌ و به‌ده‌ست نه‌بونی‌ ئاو و پێداویستی‌ سه‌ره‌تایی‌ دیكه‌وه‌ ده‌ناڵێنین. ئه‌و هاوڵاتیه‌ داوای‌ له‌ حكومه‌تی هه‌رێمیش كرد به‌ هانایانه‌وه‌ بێت و هه‌وڵی ئه‌وه‌ بده‌ن که‌ ئه‌و تۆپبارانه‌ بوه‌ستێنرێت و ئه‌وانیش بگه‌ڕێنه‌وه‌ بۆ گونده‌كانیان.
هاوکات فراكسیۆنی‌ گۆڕان له‌ په‌رله‌مانی کوردستان سه‌ردانی‌ ئاواره‌كانی‌ سنوری‌ شارۆچكه‌ی‌ سه‌نگه‌سه‌ری‌ كرد و له‌نزیكه‌وه‌ ئاگاداری‌ بارودۆخی‌ ژیانی‌ ئاواره‌كان بو، لای خۆشیه‌وه‌ ڤیان عه‌بدولره‌حیم پارله‌مانتاری‌ فراكسیۆنی‌ گۆڕان رایگه‌یاند، که‌ هێرشه‌كانی‌ ئێران شكاندنی‌ رێككه‌وتننامه‌ نێوده‌وڵه‌تییه‌كانی‌ مافی‌ مرۆڤه‌ ورێزنه‌گرتنه‌ له‌ سنوری‌ نێوده‌وڵه‌تی‌.ئاماژه‌ی به‌وه‌شدا؛ که‌ به‌رپرسیارێتی‌ ئه‌و ده‌ستدرێژییانه‌ی‌ له‌لایه‌ن ئێرانه‌وه‌ ده‌كرێنه‌ سه‌ر سنوره‌كانی‌ هه‌رێم، ده‌كه‌وێته‌ ئه‌ستۆی‌ حكومه‌تی‌ هه‌رێمی‌ كوردستان و حكومه‌تی‌ عیراق كه‌ تاكو ئێستا بێ‌ ده‌نگیان نواندوه‌ و هه‌ڵوێستیان نه‌بوه‌ به‌رامبه‌ر ئه‌و هێرشانه،‌ له‌كاتێكدا دانیشتوانی‌ ناوچه‌ سنورییه‌كان له‌ ژیانێكی‌ سه‌ختدان.تۆپبارانكردنی‌ ناوچه‌ سنورییه‌كانی‌ هه‌رێمی‌ كوردستان له‌لایه‌ن كۆماری‌ ئیسلامی‌ ئێران به‌بیانوی‌ بونی‌ گه‌ریلاكانی‌ پژاك و په‌كه‌كه‌ ماوه‌ی‌ چه‌ند ساڵێكه‌ به‌رده‌وامه‌ و به‌و هۆیه‌شه‌وه‌ چه‌ندین زیانی‌ گیانی‌ و مادی‌ لێكه‌وتۆته‌وه‌، هاوکات سه‌دان خێزانیش ئاواره‌ی‌ ناوچه‌ ئارامه‌كان بون و ده‌ستبه‌رداری‌ كشتوكاڵ و ئاژه‌ڵداری‌ و ره‌ز و باخه‌كانیان بون و گونده‌كانیان چۆڵكردوه‌.له‌ هه‌مان کاتدا حكومه‌تی‌ هه‌رێمی‌ كوردستانیش تاكو ئێستا هه‌وڵی جدی نه‌داوه‌ له‌گه‌ڵ به‌رپرسانی ئێران بۆ وه‌ستاندنی‌ تۆپبارانه‌کان و هیچ پێداویستییه‌كیشی‌ بۆ ئاواره‌كانی‌ ناوچه‌ سنورییه‌كان دابین نه‌كردوه‌.*هه‌واڵی سایتی سبه‌ی)

 

&&&&&&&&&&&&&&&&&&&&&&&&&&&&&&&&&&

تارق حه‌رب: یه‌كه‌م دانیشتنی‌ په‌رله‌مان پێویستی‌ به‌ مه‌رسومی‌ كۆماری‌ هه‌یه‌ به‌ ئیمزای‌ هه‌ر سێ‌ ئه‌ندامانی‌ ئه‌نجومه‌نی‌ سه‌رۆكایه‌تی‌

پسپۆڕێکی یاسایی‌ عێراقی ئاشکرای ده‌کات داواكردنی‌ ئه‌نجامدانی‌ یه‌كه‌م دانیشتنی‌ په‌رله‌مانی‌ نوێ‌ پێویستی‌ به‌ مه‌رسومی‌ كۆماری‌ هه‌یه‌، به‌ ئیمزای‌ هه‌ر سێ‌ ئه‌ندامانی‌ ئه‌نجومه‌نی‌ سه‌رۆكایه‌تی‌.تارق حه‌رب، پسۆڕی یاسایی رایگه‌یاند: پێویسته‌ سه‌رۆك كۆمار و هه‌ردو جێگره‌که‌ی ره‌زامه‌ندی‌ له‌سه‌ر مه‌رسومی‌ كۆماری‌ ده‌رببڕن بۆ ئه‌نجامدانی‌ یه‌كه‌مین دانیشتنی‌ په‌رله‌مانی‌ نوێ،‌ چونكه‌ له‌ مادده‌ی‌ 138ی‌ ده‌ستوردا ئه‌م مافه‌یان پێدراوه‌.وتیشی‌: تا ئێستا زیاتر له‌ چوار رۆژ تێپه‌ڕیوه‌ به‌سه‌ر په‌سه‌ندكردنی‌ ئه‌نجامی‌ هه‌ڵبژاردنه‌كان له‌لایه‌ن دادگای‌ باڵای‌ فیدڕالییه‌وه‌‌و هیچ ده‌نگدانه‌وه‌یه‌ك نییه‌‌و هیچ كه‌سێكیش به‌پێچه‌وانه‌ی‌ بڕیاره‌كه‌ی‌ دادگاكه‌ نه‌دواوه‌.تارق حه‌رب، بۆ (ئه‌سوات عێراق) ئاشکراشیکرد: ئه‌نجومه‌نی‌ سه‌رۆكایه‌تی‌ پێش په‌سه‌ندكردنی‌ ئه‌نجامه‌كان له‌لایه‌ن دادگای‌ فیدڕاڵیه‌وه‌، داوای‌ په‌له‌كردنی‌ ه‌سه‌ندكردنه‌كه‌ی‌ ده‌كرد، كه‌چی‌ له‌ئێستادا پرسه‌كه‌ گۆڕاوه‌‌و هیچ كام له‌ ئه‌ندامانی‌ ئه‌نجومه‌نه‌كه‌ ده‌نگییان نییه‌.
ه‌رباره‌ی‌ دواكه‌وتنی‌ ئه‌نجومه‌نی‌ سه‌رۆكایه‌تی‌ له‌ راسپاردنی‌ په‌رله‌مانی‌ نوێ‌ بۆ كۆبونه‌وه‌، تارق حه‌رب رایگه‌یاند: ئه‌نجومه‌نی‌سه‌رۆكایه‌تی‌ مافی‌ خۆیه‌تی‌ بۆ ماوه‌ی‌ 15 رۆژ له‌دوای‌ په‌سه‌ندكردنه‌كه‌ی‌ دادگاكه‌وه‌ داوای‌ ئه‌نجامدانی‌ دانیشتنی‌ یه‌كه‌م بكات، به‌ڵام باشتروایه‌ زوتر داوابكات تاكو په‌رله‌مانیش زوتر كۆببێته‌وه‌، ئه‌مه‌ش ده‌بێته‌ په‌یامێكی‌ دڵنیایی‌.
به‌گوێره‌ی‌ مادده‌ی‌ (54)ی‌ ده‌ستوری‌ عێراق دوای‌ په‌سه‌ندكردنی‌ ئه‌نجامی‌ هه‌ڵبژاردنه‌كان، له‌ ماوه‌ی‌ 15 رۆژدا سه‌رۆكایه‌تی كۆمار ئه‌نجومه‌نی‌ نوێنه‌ران بۆ سازكردنی‌ دانیشتنێك بانگهێشت ده‌كات، ئه‌و دانیشتنه‌ش به‌ سه‌رۆكایه‌تی‌ به‌ ته‌مه‌نترین ئه‌ندام به‌ڕێوه‌ده‌چێت و تێیدا سه‌رۆكی‌ پارله‌مان و جێگره‌كانی‌ هه‌ڵده‌بژێردرێن.هاوکات پسۆڕه‌ یاساییه‌که‌ ئاماژه‌ی بۆ ئه‌وه‌شکرد، كه‌ "له‌دوای‌ ئه‌م 15 رۆژه‌وه‌ ناكرێت واده‌ی‌ دانیشتنه‌كه‌ بۆ ماوه‌ی‌ هه‌فته‌یه‌ك یا دو هه‌فته‌  دوابكه‌وێت، ته‌نها ده‌كرێت رۆژێك یاخود دوان دوابكه‌وێت."
جێی ئاماژه‌یه‌ دوای تێبپه‌ڕبونی زیاتر له‌ مانگێک به‌سه‌ر راگه‌یاندنی ئه‌نجامی هه‌ڵبژاردنه‌ په‌رله‌مانییه‌که‌ی 7ی ئاداری عێراق، دادگای فیدڕاڵی رێکه‌وتی 1/6/2010 ئه‌نجامه‌کانی هه‌ڵبژاردنی په‌سه‌ندکرد.

&&&&&&&&&&&&&&&&&&&&&&&&&&&&&&&&&&

سه‌رۆكی‌ گردبونه‌وه‌ی‌ عه‌ره‌بی‌ هه‌ڕه‌شه‌ له‌ ئێران ده‌كات ‌
 

گردبوونه‌وه‌ی عه‌ره‌بی له‌ ئه‌نجومه‌نی پارێزگای كركوك هه‌ره‌شه‌ی به‌رپه‌رچدانه‌وه‌ی بۆردومانه‌كانی ئێران بۆسه‌ر ناوچه‌ سنوورییه‌كانی هه‌رێمی كوردستان كرد.محه‌مه‌د خه‌لیل جبوری سه‌رۆكی گردبوونه‌وه‌ی عه‌ره‌بی له‌ ئه‌نجومه‌نی پارێزگای كه‌ركوك ئیدانه‌ی بۆردومانی ناوچه‌ سنووریه‌كانی هه‌رێمی كوردستانی كرد و به‌ ئه‌سوات عیراقی راگه‌یاند"ناوچه‌كانی كوردستان به‌شێكن له‌ خاكی عیراق و هه‌ر زیانگه‌یاندێك به‌ هه‌رێمی كوردستان، زیان گه‌یاندنه‌ به‌ سه‌روه‌ریی خالكی عیراق.وتیشی‌" ئه‌گه‌ر ئه‌و ده‌ستدرێژیانه‌ی ئێران له‌ هه‌رێمی كوردستانی ده‌كات به‌رده‌وام بێت، ئه‌وا گردبوونه‌وه‌كه‌یان به‌رپه‌رچی ئێرانییه‌كان ده‌داته‌وه‌.هاوكات داوای له‌ حكومه‌تی ناوه‌ندی و كۆمه‌ڵه‌ی وڵاتانی عه‌ره‌ب كرد له‌به‌رامبه‌ر ده‌ستدرێژیه‌كانی ئێران یان هه‌ر وڵاتێكی دیكه‌ی دراوسێ بۆ سه‌ر خاكی هه‌رێمی كوردستان و عیراق بێ ده‌نگ نه‌بن و به‌پێویستیشی زانی ئه‌نجومه‌نی ئاسایشی نێوده‌وڵه‌تی له‌وباره‌یه‌وه‌ هه‌ڵوێست وه‌ربگرێت

&&&&&&&&&&&&&&&&&&&&&&&&&&&&&&&&&&

 به‌رامبه‌ر مالكی، ئیتیلافی نیشتمانی كاندیده‌كانی خۆیی ده‌ستنیشان كردوه‌

ئه‌ندامێكی ئیتیلافی نیشتمانی عێراق رایگه‌یاند، یه‌كگرتنی هه‌ردوو لیسته‌ شیعیه‌كه‌ له‌ كۆتایی ئه‌م هه‌فته‌یه‌دا ده‌بێت و ناوی پاڵێوراوه‌كانیش بۆ پۆستی سه‌رۆك وه‌زیران یه‌كلایی كراوه‌ته‌وه‌. له‌مباره‌یه‌وه‌، ئه‌ندامی ئیتیلافی نیشتمانی عێراق "به‌ها ئه‌عره‌جی" رایگه‌یاند، له‌ كۆتایی ئه‌م هه‌فته‌یه‌دا یه‌كگرتنی هه‌ردوو لیستی ئیتیلافی نیشتمانی عێراق و ده‌وڵه‌تی یاسا راده‌گه‌یه‌نرێت.وتیشی: ئێمه‌ له‌ لیستی ئیتیلافی نیشتمانی پاڵێوراوانی خۆمان بۆ ركابه‌ری پاڵێوراوه‌كه‌ی لیستی ده‌وڵه‌تی یاسا یه‌كلایی كردۆته‌وه‌.ئه‌وه‌شی دركاند، ئیتیلافی نیشتمانی به‌رامبه‌ر نوری مالكی، دوو پاڵێوراوی ده‌ستنیشان كردوه‌ ئه‌وانیش بریتین له‌ عادل عه‌بدولمه‌هدی و ئیبراهیم ئه‌لجه‌عفه‌ری.

&&&&&&&&&&&&&&&&&&&&&&&&&&&&&&&&&&

چه‌مچه‌ماڵ: له‌ هه‌ڵمه‌تێکی هێزه‌کانی ئاسایشدا بۆ ده‌ستگیرکردنی دو تۆمه‌تبار، دو کارمه‌ندی ئاسایش کوژران و ئه‌فسه‌رێکیش برینداربو

له‌هه‌ڵمه‌تێکی هێزه‌کانی ئاسایشدا به‌ مه‌به‌ستی ده‌ستگیرکردنی دو تۆمه‌تبار له‌ ناحیه‌ی شۆڕشی سه‌ربه‌ قه‌زای چه‌مچه‌ماڵ، دو که‌س له‌ تۆمه‌تباره‌کان کوژران و هاوکات کارمه‌ندێکی ئاسایش کوژراو ئه‌فسه‌رێکیش بریندار بو.سه‌عات 12ی شه‌وی 4-5/6/2010 هێزه‌کانی ئاسایش هه‌ڵیانکوتایه‌ سه‌ر ماڵێک له‌ گه‌ڕه‌کی پیرادییه‌کانی سه‌ر به‌ ناحیه‌ی شۆڕش، به‌ مه‌به‌ستی ده‌ستگیرکردنی دو تۆمه‌تبار که‌ پێشتر فه‌رمانی گرتنیان هه‌بوه‌و له‌لایه‌ن پۆلیسه‌وه‌ داواکراوبون، دواتر شه‌ڕ له‌ نێوان هه‌ردولادا دروست ده‌بێت و دو تۆمه‌تبار و کارمه‌ندێکی ئاسایش کوژران و ئه‌فسه‌رێکیش ئاسایشیش برینداربو.عه‌قید جه‌وده‌ت محه‌مه‌د ساڵح، به‌ڕێوه‌به‌ری ئاسایشی رۆژئاوای شاری سلێمانی له‌لێدوانێکدا را‌یگه‌یاند: کاتێک هێزه‌کانی ئاسایش له‌ سه‌عات 12ی شه‌و به‌ دواوه‌، بۆ ده‌ستگیرکردنی دو تاوانبار هه‌ڵیانکوتایه‌ سه‌ر ماڵێک له‌ ناحیه‌ی شۆڕش، له‌ ئاکامدا شه‌ڕ له‌ نێوان هه‌ردولا دروست بو له‌ ئه‌نجامدا دو تاوانباره‌که‌ کوژراون، هاوکات دو کارمه‌ندی ئاسایش کوژران و ئه‌سفه‌رێکیش به‌ پله‌ی رائید برینداربوه‌.وتیشی: ده‌ستگیرکردنی ئه‌و دو تاوانباره‌ به‌هۆی ئه‌نجامدانی تاوانێکیانه‌وه‌ بوه‌، که‌ ساڵی رابردو ئاسایشیکیان کوشتبو.سه‌باره‌ت به‌ ده‌نگۆی ئه‌وه‌شی که‌ ئه‌و هێزه‌ی هه‌ڵیانکوتاوه‌ته‌ سه‌ر ئه‌و ماڵه‌ سه‌ر به‌ هێزه‌کانی دژه‌ تیرۆربن، عه‌قید جه‌وده‌ت ئاماژه‌ی بۆ ئه‌وه‌کرد، که‌ له‌ ئێستادا له‌ قۆناغی لێکۆڵینه‌وه‌دان له‌ روداوه‌که‌ و دواتر ورده‌کارییه‌کان ئاشکرا ده‌که‌ن.
 

&&&&&&&&&&&&&&&&&&&&&&&&&&&&&&&&&&

عێراق.. له‌ سێ مانگدا سی و چوار به‌رپرسی قاعیده‌ كوژراون یان گیراون

سوپای ئه‌مه‌ریكا رایگه‌یاند، له‌ كۆی 42 به‌رپرسی رێكخراوی قاعیده‌ له‌ ماوه‌ی 3 مانگی رابردوودا 34 به‌رپرس كوژراون یان گیراون. فه‌رمانده‌ی سوپای ئه‌مه‌ریكا له‌ عێرق ژه‌نه‌راڵ رایموند ئۆدیرنۆ رایگه‌یاند، به‌ گوێره‌ی هه‌موو ئه‌وئامارانه‌ی له‌ به‌رده‌ستماندان ئه‌م پێنج مانگه‌ی سه‌ره‌تای ئه‌مساڵ قاعیده‌ پاشه‌كشه‌ی كردووه‌ و رێژه‌ی توندوتیژی و زیانه‌ گیانی و ماڵییه‌كان له‌ كه‌مترین ئاستدا بووه‌.گوتیشی " له‌ ماوه‌ی سێ مانگی رابردوودا 34 به‌رپرسی رێكخراوی قاعیده‌ ده‌ستگیركراون یان كوژراون به‌ تایبه‌تی دوای ئه‌وه‌ی باره‌گایه‌كی سه‌ره‌كی ئه‌و رێكخراوه‌مان له‌ موسڵ ده‌ستبه‌سه‌رداگرت".

&&&&&&&&&&&&&&&&&&&&&&&&&&&&&&&&&&

 

 

 

؛ ئاوێنه‌ ، سبه‌ی.هاولاتی

مافي ئةم ساييتة ثارصزراوة بؤ ئاراس©2006