ژووری هه‌وال / داركۆ سعید

 تازه‌ کراوه‌ته‌وه‌ له‌ ڕۆژی04/ 7/ 2009

&&&&&&&&&&&&&&&&&&&&&&&&&&&&&&

به‌ هۆی‌ خۆڵبارینه‌وه‌ گه‌شته‌ ئاسمانییه‌كانی‌ فڕۆكه‌خانه‌ی‌ هه‌ولێر راگیران
 

به‌ڕێوبه‌ری‌ كارگیِڕی‌ فڕۆكه‌خانه‌ی‌ نێوده‌وڵه‌تی‌ هه‌ولێر، رۆژی‌ شه‌ممه‌، رایگه‌یاند كه‌ گه‌شته‌كانی‌ فڕۆكه‌خانه‌كه‌یان به‌هۆی‌ خۆڵبارینه‌وه‌ تا كاتێكی‌ نادیار راگیران.كاوه‌ عه‌زیز به‌ ئاژانسی‌(ئه‌سوات ئه‌لعێراق)ی‌ وت “به‌ڕێوبه‌رایه‌تی‌ فڕۆكه‌خانه‌، سه‌رله‌به‌یانی‌ شه‌ممه‌، به‌ هۆی‌ خۆڵبارینه‌وه‌ ته‌واوی‌ گه‌شته‌ ئاسمانییه‌كانی‌ راگرتووه‌، تا كاتێكی‌ نادیار.”روونیشیكرده‌وه‌ كه‌ هه‌ر كاتێك كه‌ش‌و هه‌وا ئاسایی‌ بوه‌وه‌، راسته‌وخۆ ده‌ستده‌كرێته‌وه‌ به‌ گه‌شته‌ ئاسمانییه‌كان.روونیشیكرده‌وه‌ كه‌ له‌دوێنێ(هه‌ینی)یه‌وه‌ گه‌شته‌ ئاسمانیه‌كان راگیراون، چونكه‌ به‌هۆی كه‌مبونه‌وه‌ی ئاستی بینین، فڕۆكه‌ ناتوانێت له‌ ئاسمانی شاری هه‌ولێردا به‌رزبێته‌وه‌.”جێگه‌ی باسه‌ له‌دوێنێ‌(هه‌ینی)یه‌وه‌، ناوچه‌كانی‌ هه‌رێمی‌ كوردستانی روبه‌ڕوی‌ شه‌پۆلێكی‌ خۆڵباریان بوونه‌ته‌وه‌‌و تا كاتی‌ ئاماده‌كردنی‌ ئه‌م هه‌واڵه‌ش هه‌ر به‌رده‌وامه‌.

&&&&&&&&&&&&&&&&&&&&&&&&&&&&&&&&&&

له‌ سلێمانی هه‌شت هاوڵاتی به‌هۆی خۆڵبارینه‌وه‌ گه‌یه‌ندراونه‌ته‌ نه‌خۆشخانه‌

له‌ ئه‌نجامی خۆڵبارینێكی چرِ كه‌ سلێمانی و ده‌ورووبه‌ری گرتوه‌ته‌وه‌ تا ئێستا هه‌شت هاوڵاتی گه‌یه‌ندراونه‌ته‌ نه‌خۆشخانه‌ی فریاكه‌وتن. له‌ لێدوانێكی تایبه‌ت بۆ ئاژانسی په‌یامنێر به‌رِێوبه‌ری كه‌شناسی سلێمانی دارا حه‌مه‌ ساڵح رایگه‌یاند، له‌ ماوه‌ی 24 كاتژمێری رابردوودا پاڵه‌په‌ستۆی نزمی له‌ باشووری خۆرئاوای عێراق روویكردووه‌ته‌ هه‌رێمی كوردستان و به‌هۆیه‌وه‌ خۆڵبارینێكی چرِ شاره‌كانی هه‌رێمی گرتوه‌ته‌وه‌.گوتیشی " به‌و هۆیه‌وه‌ ئاستی بینیین بۆ 500 مه‌تر له‌ سلێمانی كه‌مبوه‌ته‌وه‌ و ئه‌مه‌ش وایكردووه‌ كه‌ پله‌ی گه‌رما له‌ به‌رزترین شوێن 34 پله‌ی سه‌دی بێت  له‌ نزمترین شوێن 22 پله‌ و راده‌ی شێ 26 له‌سه‌ده‌.هه‌ر له‌و چوارچێوه‌یه‌دا له‌ لێدوانیدا بۆ ئاژانسی په‌یامنێر به‌رِێوبه‌ری كارگێرِی نه‌خۆشخانه‌ی فریاكه‌وتی سلێمانی خدر ساڵح رایگه‌یاند،  ئه‌مرِۆ له‌ به‌ره‌به‌یانه‌وه‌ تا ئێستا 8 حاڵه‌تی تێكچوونی باری ته‌ندروستی به‌هۆی خۆڵبارینه‌وه‌ گه‌یه‌ندراونه‌ته‌ نه‌خۆشخانه‌ و ئه‌گه‌ری ئه‌وه‌ش له‌ ئارادایه‌ ئه‌و ژماره‌یه‌ زیاتر بێت.

&&&&&&&&&&&&&&&&&&&&&&&&&&&&&&&

زیندانییانی سیاسی: ئه‌و به‌ڵێنانه‌ی حکومه‌تی هه‌رێم ده‌یدات به‌شێکن له‌ هه‌ڵمه‌تی هه‌ڵبژاردن ‌
 

ده‌سته‌ی داكۆكی له‌ مافی زیندانه‌ سیاسیه‌كانی کوردستان سه‌باره‌ت به‌ جێبه‌جێنه‌كردنی داواكانیان به‌یاننامه‌یه‌كی ناره‌زاییان ڕاگه‌یاند. دوای دووساڵ چالاكی به‌رده‌وام بۆ داكۆكی له‌ مافه‌كانی زیندانیه‌ سیاسیه‌كانی كوردستان و چه‌ندین دیدارو كۆبوونه‌وه‌ له‌گه‌ڵ ده‌زگا به‌ر پرسه‌كان و پیدانی چه‌ندین به‌ڵین به‌ زیندانه‌ سیاسیه‌كانی كوردستان بۆ باشكردنی بارو گوزره‌رانی ژیانیان، زیندانی سیاسی کوردستان داوایاکرد به‌لایه‌نی كه‌مه‌وه‌ موچه‌كانیان وه‌ك موچه‌ی زیندانه‌ سیاسیه‌كانی عێراقی لیبكرێت و بۆ ئه‌و مه‌به‌سته‌ بڕیار درا له‌ شاره‌كانی سلێمانی هه‌ولێر و دهۆك نوسینگه‌ی تایبه‌تی بكرێته‌وه‌ بۆ ڕاپه‌ڕاندنی كارو باره‌كانی زیندانه‌ سیاسیه‌كان و یه‌كخستنی موچه‌كان 3/7ده‌سته‌ی داكۆكیكردن له‌ مافی زیندا سیاسیه‌كان كۆبوه‌نه‌وه‌یه‌كی به‌رفراوانیان ئه‌نجامدا له‌ پاركی ئازادی شاری سلێمانی و بایاننامه‌یه‌کیان ڕاگه‌یاند، که‌ تیایدا ئاماژه‌ به‌وه‌ کراوه‌ ئه‌و بڕیارانه‌ی پێیاندراوه‌ تا ئێستا هیچی جێبه‌جێنه‌كراوه‌ و پێیانوایه‌ ئه‌و به‌ڵینانه به‌شێکن له‌ هه‌ڵمه‌تی هه‌ڵبژاردنه‌كان ‌و بۆ مسۆگه‌ركردنی ده‌نگی زیندانییانی سیاسی و خانه‌واده‌کانیان. هه‌وه‌ها له‌ به‌شیكی تری به‌یاننامه‌كه‌دا داوا له‌ زیندانه‌ سیاسیه‌كان كراوه‌ هیچ که‌سیان ئه‌و بڕه‌ پاره‌یه‌ وه‌رنه‌گرێت كه‌ له‌لایه‌ن حکومه‌تی هه‌رێمه‌وه‌ بۆیان ته‌رخانكراوه‌ و تیایدا هاتووه‌ "وه‌رگرتنی ئه‌و بڕه‌ پاره‌یه‌ له‌لایه‌ن هه‌ر زیندانێكی سیاسی مانای له‌ده‌ستدانی مافه‌كانیانه".‌ هه‌وه‌ها به‌یاننامه‌كه‌ جه‌خت ده‌كاته‌وه‌ که‌ ده‌بێت یاسای ژماره‌ 4ی په‌رله‌مانی عێراقی تایبه‌ت به‌ زیندانه‌ سیاسیه‌كان له‌ کوردستان جێبه‌جێبكرێت. شایانی باسه‌ پێشتر  سه‌رچاوه‌یه‌کی تایبه‌ت به‌جه‌ماوه‌رنیوزی ڕاگه‌یاند، دوایئه‌وه‌ی "نه‌سرین محه‌مه‌د" په‌رله‌مانتاری سه‌ر به‌ حزبی سۆسیالیستدیموکراتی کوردستان، له‌کاتی گفتوگۆکردن له‌سه‌ر پرۆژه‌ی یاسای بودجه‌ی هه‌رێمی کوردستان داوایکرد هۆکاری نه‌دانیمووچه‌ به‌ زیندانیه‌ سیاسیه‌کان له‌لایه‌ حکومه‌تی هه‌رێمه‌وه‌ ڕوونبکرێته‌وه‌، لیژنه‌یه‌کی تایبه‌تی په‌رله‌مان و حکومه‌تی هه‌رێم له‌گه‌ڵ نوێنه‌ری زیندانیه‌ سیاسیه‌کاندا کۆبوونه‌ته‌وه‌و بڕیاریانداوه‌ له‌بری ئه‌و 500 هه‌زار دیناره‌ی ده‌درێته‌ زیندانییه‌ سیاسیه‌کانی عێراق و به‌بیانووی دانی مووچه‌ی شه‌هیدانه‌وه، حکومه‌تی هه‌رێم 390 هه‌زار دینار بدرێت به‌ زیندانییانی سیاسی کوردستان. ئه‌مه‌ش له‌کاتێکدایه‌ که‌ پێشتر له‌وه‌ڵامی په‌رله‌مانتارێکداو له‌به‌رده‌م په‌رله‌مانی کوردستاندا "ڕه‌شید تاهیر" بریکاری وه‌زاره‌تی دارایی هه‌رێم ڕایگه‌یاند "خۆ ناکرێت هه‌ر که‌س شه‌قێکی پێکه‌وتووه‌ ئێمه‌ مووچه‌ی بده‌ینێ" ئه‌م وه‌ڵامه‌ش له‌لایه‌ن ژماره‌یه‌ک له‌ په‌رله‌مانتارانی کوردستان و زیندانییه‌ سیاسیه‌کان و که‌سوکاری شه‌هیدانی زیندانه‌وه‌ بووه‌ مایه‌ی ناره‌زایی و به‌ سووکایه‌تیکردن به‌ خه‌بات و قوربانیدانی خه‌ڵکی کوردستان لێکدرایه‌وه‌.

&&&&&&&&&&&&&&&&&&&&&&&&&&&&&&&

ئه‌مه‌ریكا هه‌رِه‌شه‌ی له‌ حكومه‌تی مالكی كرد

به‌رپرسێكی ئه‌مه‌ریكی ده‌ڵێت ئه‌گه‌ر توندوتیژی له‌ عێراقدا سه‌ریهه‌ڵدایه‌وه‌ ئه‌مه‌ریكا پابه‌ندی به‌ڵێنه‌كانی نابێت وجێگری سه‌رۆكی ئه‌مه‌ریكا به‌ روونی ئه‌و هه‌رِه‌شه‌یه‌ی گه‌یاندووه‌ته‌ سه‌رۆك وه‌زیرانی عێراق. یه‌كێك له‌ گه‌وره‌ به‌رپرسانی سوپای ئه‌مه‌ریكا له‌ عێراق له‌ لێدوانێكی رۆژنامه‌وانیدا رایگه‌یاند، جێگری سه‌رۆكی ئه‌مه‌ریكا جۆزێف بایدن هه‌رِه‌شه‌ی ئه‌وه‌ی له‌ عێراقییه‌كان كردووه‌ كه‌ ئه‌گه‌ر كرده‌وه‌ی توندوتیژی له‌ عێراقدا سه‌رهه‌ڵبداته‌وه‌ ئه‌وا ئه‌مه‌ریكا پابه‌ندی به‌ڵێنه‌كانی نابێت.دوێنێ جێگری سه‌رۆكی ئه‌مه‌ریكا جۆزێف بایدن به‌سه‌ردانێكی رانه‌گه‌یه‌ندراو گه‌یشته‌ به‌غدا و له‌گه‌ڵ سه‌رۆك وه‌زیرانی عێراقی فیدراڵ نوری مالكی كۆبوه‌وه‌.له‌و كۆبونه‌وه‌یه‌دا بایدن به‌ مالكی راگه‌یاندووه‌ كه‌ "ئه‌گه‌ر توندوتیژی مه‌زهه‌بی و تائیفی له‌ عێراقدا سه‌رهه‌ڵبداته‌وه‌ ئه‌وا ئه‌مه‌ریكا هه‌ڵوێستی خۆی له‌ به‌رامبه‌ر عێراقییه‌كان ده‌گۆرِێت".به‌ گوێره‌ی ئاژانسی هه‌واڵده‌ری فه‌ره‌نسی فرانس پرێس بایدن به‌ عێراقییه‌كانی گوتووه‌ "له‌ سه‌رهه‌ڵدانه‌وه‌ی توندوتیژی له‌ عێراقدا ده‌بێته‌ هۆی نیگه‌رانی ئه‌مه‌ریكا چونكه‌ ئه‌و پرسه‌ هیچ له‌ به‌رژه‌وه‌ندی گه‌لی ئه‌مه‌ریكادا نییه‌".پرسیار له‌ به‌رپرسه‌ باڵاكه‌ی ئه‌مه‌ریكا كراوه‌ له‌ باره‌ی ئه‌وه‌ی ئه‌و قسه‌یه‌ی جۆزێف بایدن، ئایا مانای هه‌رِه‌شه‌ ده‌گه‌یه‌نێت یاخود نا، له‌ وه‌ڵامدا ئه‌و به‌رپرسه‌ی ئه‌مه‌ریكا گوتویه‌تی "نه‌خێر ئه‌وه‌ راسته‌قینه‌یه‌ و ته‌نها هه‌رِه‌شه‌ نییه‌.

&&&&&&&&&&&&&&&&&&&&&&&&&&&&&&&&&

نوری‌ مالكی وه‌ك سه‌دام حسێن حه‌زی‌ له‌ خۆده‌رخستنه‌

ڕۆژنامه‌ی‌ نیویۆرك تایمز ی‌ ئه‌مریكی‌ بڵاوی‌ كرده‌وه‌ نوری‌ مالكی سه‌رۆك وه‌زیری‌ عێراق وه‌ك سه‌دام حسێن حه‌زی‌ له‌ خۆده‌رخستنه‌..نوری‌ مالكی له‌ بۆنه‌ی‌ كشانه‌وه‌ی‌ سوپای‌ ئه‌مریكادا هیچ ئاماژه‌یه‌كی‌ به‌ رۆڵی‌ ئه‌مریكیه‌كان نه‌كرد له‌ عێراق له‌ كاتێك تا ئێستا 130 هه‌زار سه‌ربازی ئه‌مریكی له‌ عراق ماونه‌ته‌وه‌، نیویۆرك تایمزیش پێی‌ وایه‌ مالكی شێوازه‌كانی‌ سه‌دام دوباره‌ ده‌كاته‌وه‌.ئه‌و رۆژنامه‌یه‌ ئاماژه‌ی‌ به‌وه‌ش كرد: هاوڵاتیانی‌ عێراق گومانیان هه‌یه‌ له‌ دوای‌ كشانه‌وه‌ی‌ ئه‌مریكیه‌كان سوپای‌ عێراق بتوانێت ئاسایشی‌ وڵات بپارێزێت به‌ تایبه‌ت له‌ شاره‌كانی‌ به‌غدا و موسڵ.هه‌روه‌ك نوسیویه‌تی‌: له‌وانه‌یه‌ هه‌وڵه‌كانی‌ نوری‌ مالكی سه‌رۆك وه‌زیری‌ عێراق بۆ سود وه‌رگرتنی‌ دژایه‌تی‌ كردنی‌ ئه‌مریكاو به‌رز راگرتنی‌ هێزه‌كانی‌ خۆی‌، ستراتیژێكی‌ مه‌ترسیداربێت، چونكه‌ ئه‌گه‌ر عێراق سه‌رله‌نوێ توشی‌ توندوتیژی‌ ببێته‌وه‌ ئه‌وا مالكی‌ له‌لایه‌ن ركابه‌ره‌كانیه‌وه‌ هێرشی‌ ده‌كرێته‌ سه‌ر له‌ كاتێكدا ئێستا مالكی گشت سه‌ركه‌وتنه‌كان به‌ هی خۆی‌ ده‌زانێت .

&&&&&&&&&&&&&&&&&&&&&&&&&&&&&&&&&

كه‌ركوك.. خۆڵبارین مه‌ودای بینینی كه‌مكردووه‌ته‌وه‌ و نه‌خۆشخانه‌كان له‌ حاڵه‌تی ئاماده‌باشیدان

كه‌ركوك – به‌ هۆی خۆڵبارینی چرِو به‌رده‌وامه‌وه‌ مه‌ودای بینین له‌ كه‌ركوك بۆ كه‌متر له‌ 50 مه‌تر دابه‌زیووه‌ و پۆلیسی هاتوچۆ و نه‌خۆشخانه‌كان له‌ حاڵه‌تی ئاماده‌باشیدان و گله‌یشیان له‌ به‌رِێوبه‌رایه‌تی كه‌شناسی هه‌یه‌. ئه‌مرِۆ خۆڵبارینێكی چرِ شاری كه‌ركوك و ده‌ورووبه‌ری گرتۆته‌وه‌ كه‌ مه‌ودای بینین بۆ كه‌متر له‌ 50 مه‌تر دابه‌زییوه‌.عه‌قید مقدار به‌رِێوبه‌ری پۆلیسی هاتوچۆی ناوشاری كه‌ركوك گله‌یی له‌ به‌رِێوبه‌رایه‌تی كه‌شناسی كه‌ركوك كرد و گوتی "ئه‌وان له‌ حاڵه‌تی له‌و جۆره‌ ئاگاداریان نه‌كردووینه‌ته‌وه‌ بۆ ئه‌وه‌ی ئاماده‌كاری پێویست بكه‌ین و دوای ئه‌وه‌ی خۆڵبارین ده‌ستی پێكرد به‌ پێویستمان زانی هه‌موو مه‌فره‌زه‌كانمان بخه‌ینه‌ ئاماده‌باشیه‌وه‌ وه‌ رێگاكانی ناوشار و ده‌ره‌وه‌ی شار كۆنترڵ به‌ین. هه‌ر له‌وچوارچێوه‌یه‌دا ئاوات كاكه‌یی به‌رپرسی راگه‌یاندنی به‌رِێوبه‌رایه‌تی ته‌ندروستی كه‌ركوك به‌ ئاژانسی په‌یامنێری راگه‌یاند، بنكه‌كانی ته‌ندروستی كه‌ركوك و ته‌واوی نه‌خۆشخانه‌كان له‌ ئاماده‌باشیدان بۆ ئه‌وه‌ی پێشوازی له‌و حاڵه‌تانه‌ بكه‌ن كه‌ به‌ هۆی خۆڵبارینه‌وه‌ روو له‌ نه‌خۆشخانه‌كان ده‌كه‌ن.هه‌ر له‌و چوارچێوه‌یه‌دا گله‌یی ئه‌وه‌ له‌ به‌رِێوبه‌رایه‌تی كه‌شناسی كه‌ركوك كراوه‌ كه‌ له‌ به‌رایی ده‌ستپێكردنی ئه‌و دۆخه‌ ئاڵۆزانه‌ی كه‌شوهه‌وا هیچ زانیاریه‌ك پێشكه‌ش به‌ ناوه‌نده‌ ده‌وڵه‌تییه‌كان و هاوڵاتیان ناكه‌ن.

&&&&&&&&&&&&&&&&&&&&&&&&&&&&&&&&&&

ده‌یانه‌وێت بۆ هه‌ڵبژاردنی‌ داهاتووی‌ عێراق لیستی‌ داخراو په‌یڕه‌و بكرێت

ئه‌ندامێكی‌ په‌رله‌مانی‌ عێراق له‌ لیستی‌ ئه‌لعێراقییه‌، رۆژی‌ هه‌ینی‌، رایگه‌یاند زۆرێك له‌ هێزه‌ نیشتیمانییه‌كانی‌ نێو پرۆسه‌ی‌ سیاسیی‌ عێراق ده‌یانه‌وێت له‌ هه‌ڵبژاردنی‌ داهاتووی‌ عێراقدا سستمی‌ لیستی‌ داخراو په‌یڕه‌و بكرێت به‌ڵام لیستی‌ ئه‌لعێراقییه‌ ئه‌و بۆچوونه‌ ره‌ت ده‌كاته‌وه‌.عالیه‌ نسه‌یف به‌ ئاژانسی‌ (ئه‌سوات ئه‌لعیراق)ی‌ راگه‌یاند “زۆربه‌ی‌ هێزه‌ نیشتیمانییه‌كانی‌ نێو پرۆسه‌ی‌ سیاسیی‌ عێراق ده‌یانه‌وێت له‌ هه‌ڵبژاردنی‌ داهاتووی‌ په‌رله‌مانی‌ عێراقدا پشت به‌ یاسای‌ هه‌ڵبژاردنی‌ ساڵی‌ 2005 ببه‌سترێت به‌ چه‌ند هه‌مواركردنێكه‌وه‌، به‌شێوه‌یه‌ك كه‌ سستمی‌ لیستی‌ داخراو په‌یڕه‌و بكرێت‌و عێراق یه‌ك بازنه‌ی‌ هه‌ڵبژاردن بێت”، رونیشیكرده‌وه‌ كه‌ ئه‌و پێشنیاره‌ ده‌خرێته‌ به‌رده‌م په‌رله‌مان.عالیه‌ نسه‌یف پێشبینیشی‌ كرد په‌رله‌مان ره‌زامه‌ندی‌ له‌سه‌ر پێشنیاره‌كه‌ نیشان بدات چونكه‌ “زۆرێك له‌ كوتله‌ كاریگه‌ره‌كانی‌ نێو په‌رله‌مان پشتگیری‌ له‌ سستمی‌ لیستی‌ داخراو ده‌كه‌ن”، به‌ڵام ئاماژه‌ی‌ به‌وه‌دا كه‌ لیستی‌ ئه‌لعێراقییه‌ ده‌یه‌وێت “عێراق یه‌ك بازنه‌ی‌ هه‌ڵبژاردن نه‌بێت به‌ڵكو چه‌ند بازنه‌یه‌ك بێت‌و سستمی‌ لیستی‌ كراوه‌ش په‌يڕه‌و بكرێت.”وتیشی‌ “ئێمه‌ له‌و بڕوایه‌داین كه‌ په‌یڕه‌وكردنی‌ سستمی‌ لیستی‌ داخراو پێشێلكردنی‌ مافی‌ ده‌نگده‌ره‌ له‌وه‌ی‌ به‌ ئازادی‌ نوێنه‌رانی‌ خۆی‌ هه‌ڵبژێرێت.”ئه‌ندامه‌كه‌ی‌ په‌رله‌مان ئاماژه‌ی‌ به‌وه‌شدا كه‌ “لیستی‌ ئه‌لعێراقییه‌ پێشنیاری‌ كردووه‌ لیژنه‌یه‌ك پێكبهێنرێت بۆ چاودێریكردنی‌ كاری‌ كۆمیسیۆنی‌ باڵای‌ هه‌ڵبژاردنه‌كان، به‌مه‌به‌ستی‌ پاراستنی‌ بێگه‌ردیی‌ پرۆسه‌ی‌ هه‌ڵبژاردن‌و رێگه‌گرتن له‌و پێشێلكارییانه‌ی‌ له‌ هه‌ڵبژاردنه‌كانی‌ پێشوودا روویان داوه‌.”بڕیاره‌ هه‌ڵبژاردنی‌ په‌رله‌مانی‌ عێراق له‌ 30ی‌ كانونی‌ دووه‌می‌ ساڵی‌ داهاتوودا به‌ڕێوه‌بچێت.

&&&&&&&&&&&&&&&&&&&&&&&&&&&&&&&&&

له‌ رووداوێكی هاتووچۆدا پێنج كه‌س برینداربون

له‌ رێگای نێوان شاری (هه‌ولێر- كه‌ركوك) به‌ هۆی وه‌رگه‌رِانی ئۆتۆمبێلێك پێنج كه‌س برینداربون. به‌ پێی ئه‌و زانیاریانه‌ی به‌ده‌ست(ئاژانسی هه‌واڵی په‌یامنێر)گه‌یشتووه‌:دوێنێ له‌ نزیك ناحیه‌ی پردێ ئۆتۆمبێلێكی جۆری تویوتا نیسان وه‌رگه‌رِا،له‌ ئاكامدا پێنج له‌سه‌ر نشینانی به‌ ناوی(خالید،مسته‌فا،روشدی،كه‌مال،ساجیده‌)كه‌ ته‌مه‌نیان له‌نێوان(30تا50ساڵ)ده‌بێت برینداربوونه‌، دواتر قوربانیه‌كان گواسترانه‌وه‌ نه‌خۆشخانه‌، به‌ پێی زانیاریه‌كان باری ته‌ندروستی قوربانیه‌كان جێگیره‌، هاوكات هۆكاره‌كانی رووداوه‌كه‌ له‌ئاكامی خێرالێخورینه‌وه‌ روویداوه‌.له‌لای خۆیه‌وه‌ پۆلیس به‌ پێی مادده‌ی23هاتووچۆ په‌راوی بۆ رووداوه‌كه‌ كردۆته‌وه.

&&&&&&&&&&&&&&&&&&&&&&&&&&&&&&&&&&

ئێران 10 ساڵ زیندانی‌ به‌سه‌ر ڕۆژنامه‌نوس عه‌دنان حه‌سه‌ن پور سه‌پاند

دادگای‌ قه‌زائی‌ ئێران بڕیاری زیندانی‌ كردنی‌ ڕۆژنامه‌نوسی‌ ئێرانی‌ (عه‌دنان حه‌سه‌ن پوور) بۆ ماوه‌ی‌ 10 ساڵ سه‌پاندو هه‌واڵنێرانی‌ بێسنوریش ئیدانه‌ی‌ ئه‌و حوكمه‌ ده‌كه‌ن.دوای‌ ئه‌وه‌ی‌ ڕۆژنامه‌نووس عه‌دنان حه‌سه‌ن پوور به‌ چه‌ندین نوسین و كاری‌ ڕۆژنامه‌نوسی‌ ڕه‌خنه‌ی‌ توندی‌ له‌ سیسته‌می‌ حوكمڕانی‌ ئه‌و ولاَته‌ گرت, ده‌سه‌لاَتدارانی‌ ئێرانی‌ حوكمی‌ له‌ سێداره‌دانیان بۆ ده‌ركردو دواتر و به‌هۆی‌ ده‌نگۆی‌ ناره‌ِزایی‌ ڕێكخراوه‌كانی‌ نێوخۆو ده‌ره‌وه‌و ئه‌و كه‌سانه‌ی‌ له‌ بواری‌ ڕۆژنامه‌وانی‌ و مافی‌ مرۆڤ كار ده‌كه‌ن , حوكمه‌كه‌یان گۆِری‌بۆ پێچونه‌وه‌یه‌كی‌ ترو دوای‌ 20 مانگ له‌و حوكمه‌ دادگای‌ شۆڕشی‌ سنه‌ دادگایی‌ حوكی‌ ده‌ ساڵ زیندانی‌ بۆ بڕایه‌وه‌.
له‌ یه‌كه‌م كاردانه‌وه‌ی‌ به‌هێزیشدا ڕێكخراوی‌ په‌یامنێرانی‌ بێسنوور به‌ توندی‌ ئیدانه‌ی‌ ئه‌و حوكمه‌یانكردو به‌ گاڵته‌جاڕی‌ و پێشلێكردنی‌ مافی‌ ڕاده‌بڕین و به‌رته‌سككردنه‌وه‌ی‌ ئازاداییه‌گانیان وه‌سفكرد له‌ ئێران.ڕێكخراوی‌ په‌یامنێرانی‌ بێسنوور داوایانكرد" به‌ زووترین كات ناوبراو ئازاد بكرێت و چیتر به‌ زیندان و هه‌ڕه‌شه‌ ڕۆژنامه‌نووسانی‌ ئه‌وولاَته‌ نه‌ترسێنرێن .

&&&&&&&&&&&&&&&&&&&&&&&&&&&&&&&&&&

 

 

 

 

چاودیر؛ ئاوێنه‌ ، سبه‌ی

 

 

 

 

 

مافي ئةم ساييتة ثارصزراوة بؤ ئاراس©2006